काठमाडौं, १४ वैशाख । नेपाली कांग्रेसले राष्ट्रिय सभा दलको नेतृत्व फेरबदल गर्ने तयारी थालेको छ ।
हालका नेता कृष्ण प्रसाद सिटौलालाई प्रतिस्थापन गर्दै नयाँ नेता चयन गर्ने प्रक्रिया अघि बढाइएको हो । पार्टी विधानअनुसार प्रतिनिधिसभा संसदीय दलका नेताले राष्ट्रिय सभा दलको नेता चयन गर्ने अधिकार राख्ने व्यवस्था छ ।
सोही प्रावधानअनुसार अब राष्ट्रिय सभामा नयाँ नेतृत्व ल्याउने तयारी गरिएको उनले जनाए । प्रतिनिधिसभामा नयाँ दलको नेता चयन भएसँगै राष्ट्रिय सभा दलमा पनि नयाँ म्यान्डेटअनुसार नेतृत्व परिवर्तन गर्न लागिएको हो ।
सोमबार मात्रै प्रतिनिधिसभामा कांग्रेस संसदीय दलको नेताका रूपमा भीष्मराज आङ्देम्बे चयन भइसकेका छन् । अब राष्ट्रिय सभा दलको नयाँ नेता चयन गर्ने जिम्मेवारी पनि उनैको काँधमा रहनेछ ।
