काठमाडौं, १४ वैशाख । नेपाली कांग्रेसको प्रतिनिधिसभा संसदीय दलको नेतामा भीष्मराज आङ्देम्बे सर्वसम्मत रूपमा चयन भएको छ ।
सोमबार बसेको संसदीय दलको बैठकले उनलाई निर्विरोध रूपमा नेता बनाउने निर्णय गरेको हो । संसदीय दल निर्वाचन समितिका संयोजक तथा सहमहामन्त्री प्रकाश रसाइलीका अनुसार बैठकमा आङ्देम्बेको नाममा कुनै प्रतिस्पर्धा नभएपछि उनलाई सर्वसम्मत रूपमा चयन गरिएको हो ।
पार्टीभित्र संसदीय दलको नेताका लागि करिब दुई महिनादेखि प्रतिस्पर्धा चलिरहेको थियो। अन्ततः कार्यसम्पादन समितिको बैठकले आङ्देम्बेलाई नै सर्वसम्मत रूपमा अघि सार्ने सहमति गरेपछि प्रक्रिया सहज बनेको हो ।
यसअघि उक्त पदका लागि अर्जुननरसिंह केसी र मोहन आचार्यले पनि दाबी प्रस्तुत गर्दै आएका थिए, जसका कारण सहमति जुटाउन केही समय लागेको थियो ।
