काठमाडौं, १३ बैशाख । प्रहरीले देशभर सञ्चालन गरेको नियमित गस्ती तथा निगरानीका क्रममा विभिन्न स्थानबाट लागुऔषधसहित ४१ जनालाई नियन्त्रणमा लिएका छन् ।
काठमाडौँ महानगरपालिका–३२ जडीबुटी क्षेत्रबाट एक किशोरलाई १३० थान ट्रामाडोल ट्याब्लेट र रु ६८ हजार २०० नगदसहित पक्राउ गरिएको छ । ट्रामाडोल चिकित्सकको सिफारिसबिना खरिद–बिक्री गर्न नपाइने औषधि हो ।
केन्द्रीय प्रहरीका अनुसार कैलाली, सुर्खेत, कपिलवस्तु, सुनसरी र दाङ लगायतका जिल्लाका विभिन्न स्थानबाट खैरो हेरोइनसहित १० जना पक्राउ परेका छन् । उनीहरूबाट लागुऔषध नापजाँच गर्न प्रयोग गरिने तराजु र नगदसमेत बरामद गरिएको छ ।
यसैगरी, काठमाडौँका सुकेधारा र बल्खु क्षेत्रबाट पनि केही व्यक्तिहरूलाई खैरो हेरोइन र ठूलो परिमाणमा ट्रामाडोल ट्याब्लेटसहित नियन्त्रणमा लिइएको छ । त्यसैगरी इलाम, झापा, कञ्चनपुर, रुपन्देही, मोरङ, रुकुमपश्चिम, दाङ, बर्दिया, कास्की र धनुषा जिल्लाका विभिन्न स्थानबाट समेत नाइट्राजेपाम ट्याब्लेटसहित अन्य व्यक्तिहरू पक्राउ परेका छन् । प्रहरीले पक्राउ परेकामाथि आवश्यक अनुसन्धान अगाडि बढाएको जनाएको छ ।
