काठमाडौं, १२ वैशाख । काठमाडौंमा सरकारले शनिबारदेखि सुकुमवासी बस्ती हटाउने अभियान सुरु गरेको छ ।
थापाथलीस्थित बागमती नदी किनारबाट संरचना भत्काउने काम बिहानैदेखि सुरु गरिएको हो। शान्तिनगर, गैह्रीगाउँ र मनोहरा क्षेत्रमा रहेका बस्तीहरूलाई आज र भोलिभित्र हटाउने योजना रहेको छ ।
बस्ती हटाउने क्रममा खानेपानी पाइप फुट्दा बालाजु, माइतीघर र एकान्तकुरा क्षेत्रमा पानी आपूर्ति अवरुद्ध हुने भएको छ। पाइप मर्मतका लागि भल्भ बन्द गरिने जनाइएको छ ।
नेपाल प्रहरी, सशस्त्र प्रहरी र नगर प्रहरीको टोली स्थानान्तरणमा खटिएको छ । सुरुवाती विरोधपछि धेरैजसो सुकुमवासी स्वयं बस्ती खाली गर्न थालेका छन् भने थापाथलीमा डोजर सञ्चालन भइसकेको छ ।
