काठमाडौं, ११ वैशाख । जिल्ला प्रशासन कार्यालय काठमाडौंले नदी किनारका सार्वजनिक तथा सरकारी जग्गामा बसेका अनधिकृत बस्तीहरू हटाउन अत्यन्त जरुरी सूचना जारी गरेको छ ।
सार्वजनिक आवागमन, शहरी पूर्वाधार र नदीको बहावमा असर परेको भन्दै वैशाख ११ गते साँझसम्म बस्ती खाली गर्न निर्देशन दिइएको हो ।
आफैँ सार्न नसक्नेले सुरक्षाकर्मीको सहयोग लिन सक्ने र बालबालिका, वृद्ध, अपाङ्गता भएका तथा बिरामीलाई प्राथमिकताका साथ सुरक्षित स्थानमा सार्न आग्रह गरिएको छ । प्रशासनले वैशाख १२ गते बिहानदेखि संरचना हटाइने र अवरोध गर्नेलाई कानुनी कारबाही हुने चेतावनी दिएको छ ।
विस्थापित परिवारलाई अस्थायी बसोबासको व्यवस्था गरिने र वास्तविक भूमिहीन सुकुम्बासीको पहिचान गरी आगामी दिनमा स्थायी समाधानतर्फ प्रक्रिया अघि बढाइने जनाइएको छ । 
