काठमाडौं, ११ वैशाख । तनहुँको शेराफाँट क्षेत्रमा यात्रुबाहक बस दुर्घटना भएका छन् ।
जिल्ला प्रशासन कार्यालयका सहायक प्रमुख जिल्ला अधिकारी दिपक रेग्मीका अनुसार दुर्घटनामा परेका घाइतेहरूको उद्धार कार्य तीव्र रूपमा जारी छ । ग २ ख १८३६ नम्बरको बस दुर्घटनामा परेको हो ।
प्रारम्भिक विवरण अनुसार बसमा करिब ३० जना यात्रु सवार रहेका थिए, जसमध्ये २७ जना घाइते भएका छन् । घाइतेहरूलाई उपचारका लागि जीपी अस्पताल बेलचौतारामा लगिएको छ ।
घटनास्थलमा स्थानीय बासिन्दा र प्रहरीको सहकार्यमा उद्धार कार्य भइरहेको छ । जिल्ला प्रहरी कार्यालय तनहुँका प्रमुख टेकबहादुर काकीले थप विवरण आउन बाँकी रहेको जानकारी दिएका छन् ।
उक्त बस पोखरा बाट भैरहवा जाँदै थियो । हालसम्म मानवीय क्षतिको विस्तृत विवरण प्राप्त भइसकेको छैन भने प्रहरीले घटनाको कारणबारे अनुसन्धान सुरु गरेको जनाएको छ ।
