काठमाडौं, ८ वैशाख । प्रतिनिधिसभा नियमावलीअनुसार प्रधानमन्त्रीसँग प्रत्येक महिनामा संसद् बैठकमा प्रत्यक्ष प्रश्नोत्तर गर्ने व्यवस्था यथावत् रहेको छ ।
नियमावलीको नियम ५६ अनुसार प्रधानमन्त्रीसँग सम्बन्धित महत्वपूर्ण विषयमा प्रश्न सोध्न प्रत्येक महिनाको पहिलो हप्ताको कुनै एक दिन संसद् बैठकको पहिलो एक घण्टा निर्धारण गरिने व्यवस्था छ ।
उक्त समय सभामुखले तय गर्नेछन् । उक्त अवधिमा सभामुखले प्रश्नकर्ताको नाम बोलाउने र सम्बन्धित सांसदले आफ्नो स्थानबाटै प्रधानमन्त्रीसँग प्रश्न सोध्न सक्ने व्यवस्था रहेको छ । प्रधानमन्त्रीले सोही समयमा प्रश्नको जवाफ दिनुपर्ने प्रावधान छ । एक दिनको बैठकमा बढीमा १५ जना सांसदले मात्र प्रश्न सोध्न पाउने व्यवस्था छ भने एक प्रश्नको जवाफपछि क्रमशः अर्को सांसदलाई अवसर दिइनेछ ।
प्रत्यक्ष प्रश्नोत्तर कार्यक्रमलाई सरकारी तथा अन्य सञ्चार माध्यमबाट प्रत्यक्ष प्रसारण गर्न सकिने व्यवस्था पनि नियमावलीमा उल्लेख छ । प्रश्न सोध्न इच्छुक सांसदले भने बैठक सुरु हुनुभन्दा कम्तीमा तीन दिन अगावै आफ्नो प्रश्नको विषयबारे सभामुखलाई लिखित जानकारी दिनुपर्ने हुन्छ ।
