काठमाडौै, ८ वैशाख । अर्थमन्त्री डा. स्वर्णिम वाग्ले र अमेरिकी दक्षिण तथा मध्य एशियाली मामिला हेर्ने सहायक विदेशमन्त्री एस पल कपुरबीच आर्थिक सहकार्य र लगानीका विषयमा मंगलबार भेटवार्ता भएको छ ।
अर्थमन्त्रालयमा भएको उक्त भेटमा द्विपक्षीय आर्थिक सम्बन्ध सुदृढ गर्ने विषयमा छलफल केन्द्रित रहेको जनाइए । भेटमा नेपालस्थित अमेरिकी दूतावास र परराष्ट्र मन्त्रालयका प्रतिनिधिहरू पनि सहभागी थिए । नेपाल भ्रमणमा रहेका कपुरले सोही दिन परराष्ट्रमन्त्री शिशिर खनालसँग पनि शिष्टाचार भेट गरेका छन् ।
सिंहदरबारमा भएको उक्त भेटमा नेपाल–अमेरिका सम्बन्ध थप मजबुत बनाउने र व्यापार तथा लगानीका सम्भावनाहरू विस्तार गर्ने विषयमा कुराकानी भएको परराष्ट्र मन्त्रालयले जनाए । कपुर नयाँ सरकार गठनपछि नेपाल भ्रमण गर्ने उच्च तहका अमेरिकी कूटनीतिज्ञमध्येका एक हो ।
उनको भ्रमणलाई नेपाल र अमेरिकाबीचको सम्बन्ध विस्तार गर्ने प्रयासका रूपमा पनि हेरिएको छ । यस क्रममा उनले राष्ट्रिय स्वतन्त्र पार्टीका सभापति रवि लामिछानेसँग पनि भेटवार्ता गरेका थिए । भेटपछि उनले नयाँ सरकारका प्राथमिकता बुझ्ने र दुई देशबीच सहकार्यका क्षेत्र पहिचान गर्ने अवसर मिलेको बताएका थिए ।
