काठमाडौं, ७ बैसाख । नेपाली फुटबल अहिले गम्भीर संकट र अन्योलको अवस्थाबाट गुज्रिरहेको छ ।
अखिल नेपाल फुटबल संघ -एन्फा) भित्रको आन्तरिक विवाद र राष्ट्रिय खेलकुद परिषद् -राखेप) द्वारा गरिएको निलम्बनले समग्र फुटबल संरचना नै प्रभावित भएको छ ।
यस अवस्थाले नेपाली फुटबलको भविष्यबारे अनेक प्रश्न उठेका छन् । यदि फिफा ले हस्तक्षेप गर्दै निलम्बन फिर्ता नलिएमा नेपालले आउँदै गरेको साफ महिला च्याम्पियनसिप मा सहभागिता जनाउन नपाउने जोखिम बढेको छ । विवादकै कारण देशका प्रमुख घरेलु प्रतियोगिताहरू पनि प्रभावित भएका छन् ।
राष्ट्रिय लिग अनिश्चितकालका लागि स्थगित छ भने चार खेल मात्र सम्पन्न भएको शहीद स्मारक महिला लिगको भविष्य समेत अन्योलमा परेको छ ।
यसले खेलाडीहरूको करिअर, अभ्यास र अन्तर्राष्ट्रिय प्रतिस्पर्धामा सहभागितामा प्रत्यक्ष असर पारेको छ । विश्लेषकहरूका अनुसार अहिलेको संकटको जिम्मेवारी एक पक्षमा मात्र सीमित छैन । एन्फा नेतृत्व, कार्यसमिति, जिल्ला संघ, क्लब र समग्र फुटबल सरोकारवालाहरूबीच समन्वय अभाव देखिएको छ ।
नेपाली फुटबललाई यो अवस्थाबाट बाहिर निकाल्न पारदर्शी नेतृत्व, संस्थागत सुधार र सरोकारवालाबीच सहकार्य अत्यावश्यक देखिन्छ। अन्यथा, अन्तर्राष्ट्रिय प्रतिबन्ध र घरेलु संरचनाको कमजोर अवस्थाले दीर्घकालीन क्षति पुयाउने खतरा बढ्दो छ ।
