काठमाडौं, ६ बैशाख । माध्यमिक शिक्षा परीक्षा (एसइई) को नतिजा वैशाख महिनामै सार्वजनिक गर्ने तयारी तीव्र पारिएको छ ।
परीक्षा सकिएको एक साता भित्रै उत्तरपुस्तिका परीक्षण सम्पन्न भएपछि अहिले नतिजा तयारीको काम अन्तिम चरणमा पुगेको राष्ट्रिय परीक्षा बोर्डले जनाए । यस वर्ष चैत १९ देखि २९ गतेसम्म सञ्चालन भएको परीक्षामा सहभागी पाँच लाखभन्दा बढी विद्यार्थीको उत्तरपुस्तिका परीक्षण अधिकांश जिल्लामा सकिएको छ ।
बाँकी केही जिल्लाको काम पनि अन्तिम चरणमा रहेको परीक्षा नियन्त्रण कार्यालय कक्षा–१० ले जनाए । बोर्डका अनुसार नतिजा छिटो निकाल्न यस पटक प्रत्येक जिल्लामा नै परीक्षण केन्द्र तोकिएको थियो ।
उत्तरपुस्तिका संकलन, मार्कस्लिप इन्ट्री र तथ्याङ्क मिलानको काम तीव्र रूपमा भइरहेको छ । परीक्षा नियन्त्रक टुकराज अधिकारीका अनुसार हाल बोर्डका करिब ४० जना कर्मचारी नतिजा तयारीमा खटिएका छन् ।
उनले सबै प्रक्रिया समयमै पूरा भए वैशाखभित्रै नतिजा सार्वजनिक हुने सम्भावना रहेको बताए । पहिले करिब तीन महिनासम्म लाग्ने एसइई नतिजा यस पटक एक महिनाभित्रै निकाल्ने लक्ष्यअनुसार काम भइरहेको बोर्डले जनाए ।
