काठमाडौं, ६ बैशाख । नेपाली राष्ट्रिय महिला भलिबल टोली नयाँ कप्तानको खोजीमा रहेका छन् ।
लामो समयसम्म सफल नेतृत्व गरेकी अरुणा शाही अस्ट्रेलिया गएपछि आगामी काभा महिला भलिबल च्याम्पियनसिपका लागि नयाँ कप्तान चयन गर्ने तयारी भइरहेको हो । सन् २०१९ देखि टोलीको कप्तानी सम्हालेकी अरुणाले नेपाललाई विभिन्न अन्तर्राष्ट्रिय प्रतियोगितामा उल्लेखनीय सफलता दिलाएकी थिइन् ।
तर हाल उनी टिम सेटअपमा नहुँदा नेतृत्वको जिम्मेवारी नयाँ खेलाडीले सम्हाल्ने निश्चितजस्तै भएको छ । हाल प्रशिक्षणमा रहेका खेलाडीमध्ये निरुता ठगुन्ना, उषा भण्डारी र सलिना श्रेष्ठ कप्तानका प्रमुख दाबेदार मानिएका छन् ।
यी तीनै जना अनुभवी खेलाडी हुन् र घरेलु प्रतियोगितामा पनि नेतृत्व गरिसकेका छन् । नेपाल भलिबल संघका अनुसार अन्तिम टोली छनोटपछि मात्रै नयाँ कप्तान घोषणा गरिनेछ । मुख्य प्रशिक्षक जगदिश भट्टले अन्तिम निर्णय टोली चयनसँगै हुने बताए ।
