काठमाडौं, ५ वैशाख । जनता समाजवादी पार्टी नेपाल -जसपा नेपाल) ले भारतबाट ल्याइने सामानमा सय रुपैयाँभन्दा बढीमा भन्सार लगाउने सरकारी निर्णयको विरोध गरेको छ ।
पार्टीका संरक्षक महन्थ ठाकुरले उक्त व्यवस्था मधेसका नागरिकमाथि ज्यादती भएको बताएका छन् । सरकारले सीमा क्षेत्रका बासिन्दाले भारतबाट ल्याउने दैनिक उपभोग्य वस्तुमा कडाइ गर्दै सय रुपैयाँभन्दा बढीमा भन्सार तिर्नुपर्ने नियम लागू गरेपछि यसप्रति असन्तुष्टि बढेको हो ।
जसपा नेपालले यो नीति सीमावर्ती नागरिकलाई लक्षित र अव्यावहारिक भएको भन्दै पुनर्विचार गर्न माग गरेको छ । पार्टीले यस्तो निर्णयले नागरिकको दैनिक जीवन, सामाजिक-सांस्कृतिक सम्बन्ध र नेपाल–भारत आवतजावतमा असर पर्ने चेतावनी दिँदै पुरानै व्यवस्था कायम गर्न सरकारसँग आग्रह गरेको छ ।
