काठमाडैं, ४ बैशाख । अछामको तुर्माखाँद गाउँपालिका–३ भैरवस्थानस्थित कर्णाली नदीमा डुङ्गा पल्टिँदा बाबु–छोरा बेपत्ता भएका छन् ।
जिल्ला प्रहरी कार्यालय अछामका अनुसार बेपत्ता हुनेमा तुर्माखाँद गाउँपालिका–३ बल्देका ३५ वर्षाका पहलसिंह बुढा र उनका १३ वर्षाका छोरा नरि बुढा रहेका छन् ।
घटना वैशाख ३ गते बेलुका भएको हो । कर्णालीपारि सुर्खेतको पञ्चपुरी नगरपालिका–७ स्थित वनबाट घाँस काटेर फर्किने क्रममा एक्कासि डुङ्गा पल्टिँदा बाबु–छोरा नदीमा बेपत्ता भएका हुन् ।
बेपत्ताको खोजीका लागि अस्थायी प्रहरी सुरक्षा बेस माथिल्लो कर्णाली, प्रहरीचौकी भैरवस्थान, ढुङ्गाचाल्ना र ढकारीबाट सुरक्षाकर्मी परिचालन गरिएको छ ।
साथै सशस्त्र प्रहरीको विपद् उद्धार तालिमप्राप्त टोली पनि घटनास्थलतर्फ जाँदै गरेको प्रहरीले जनाएको छ । घटनाबारे थप अनुसन्धान भइरहेको छ।
