काठमाडौं, ४ बैशाख । गृहमन्त्री सुधन गुरुङले कानून उल्लंघन गर्ने जोसुकैलाई पनि नछाड्ने बताएका छन् ।
उनले आफ्नै परिवारका सदस्य भए पनि गल्ती गरेमा कारबाहीको दायरामा ल्याइने स्पष्ट पारेको हो । बिहीबार साँझ सुरक्षा पत्रकारहरूसँगको भेटमा उनले अनुहार नहेरी दोषीमाथि कारबाही गर्ने नीति अपनाइएको बताए ।
“गल्ती गर्ने जो कोहीलाई पनि छाडिँदैन, चाहे मेरो आफ्नै बाबु किन नहोस्,” उनले भने । उनले हालसम्म विभिन्न व्यक्तिमाथि कारबाहीको प्रयास भइरहेको भए पनि अदालतबाट केही मुद्दामा अपेक्षित निर्णय नआएको भन्दै असन्तुष्टि व्यक्त गरे ।
विशेषगरी उच्च तहका व्यक्तिहरू पक्राउ परेपछि अदालतबाट रिहा भएको विषयमा उनले चिन्ता बताए । गृहमन्त्री गुरुङका अनुसार कानूनी प्रक्रियामा देखिएका कमजोरीलाई सुधार गर्न आफूले कानूनको अध्ययन सुरु गरेका छन् ।
हाल केही समयदेखि भीआईपीमाथिको कारबाही सुस्त देखिए पनि यो अस्थायी अवस्था मात्र भएको उनको भनाइ छ ।
