काठमाडौं, १ बैशाख । ऊर्जा मन्त्री विराजभक्त श्रेष्ठले पदभार सम्हालेपछि पहिलो दुई सातामा भएका कामहरूको विवरण सार्वजनिक गरेको छ ।
मन्त्री श्रेष्ठका अनुसार शासकीय सुधार कार्यसूची कार्यान्वयनका लागि मातहत निकाय परिचालन गरिएको छ भने सुशासन इकाइ गठन गरी कार्यसम्पादन अनुगमन सुरु गरिएको छ । विद्युत् हटलाइन ११५१ मा प्राप्त ४,२६९ गुनासो सबै समाधान गरिएको पनि उनले बताए । ऊर्जा निर्यात तथा खपत रणनीति बनाउन समिति गठन भई प्रारम्भिक मस्यौदा तयार भएको छ ।
साथै, जलस्रोत, नवीकरणीय ऊर्जा लगायतका विधेयक संसदमा पेश गर्ने तयारी गरिएको छ । त्यसैगरी, अलपत्र आयोजना पुनरावलोकन, ‘पेन्डिङ पीपीए’ टुंग्याउने, र विद्युत् अनुमतिपत्र प्रक्रिया सुधारका लागि विभिन्न समिति गठन गरिएको छ ।
शहीद परिवारलाई रोजगारी दिने प्रक्रिया अघि बढाइएको छ भने दातृ निकायसँग ऊर्जा परियोजनामा सहकार्यका लागि संवाद भइरहेको मन्त्रालयले जनाए । ऊर्जा क्षेत्रको दीर्घकालीन विकास, प्रसारण लाइन निर्माण, ठूला आयोजना अगाडि बढाउने तथा विपद् पूर्वतयारीलाई समेत प्राथमिकतामा राखिएको मन्त्री श्रेष्ठले बताए ।
