सिरहा, १ वैशाख । सिरहाको ऐतिहासिक तथा धार्मिक स्थल सलहेश फूलबारीमा नयाँ वर्ष २०८३ को अवसरमा मेला लागेको छ ।
वैशाख १ गते सुनाखरी फूल दर्शन र पूजा गर्न बिहानैदेखि भक्तजनको ठूलो भीड लागेको छ । लहान–१२ र २२ मा फैलिएको फूलबारीमा फक्रिएको सुनाखरीलाई राजा सलहेश र मालिनीको प्रेमको प्रतीक मानिन्छ ।
नेपाल र भारतका विभिन्न स्थानबाट आएका भक्तजनहरूले पूजा गर्दा मनोकामना पूरा हुने धार्मिक विश्वास छ । भीड व्यवस्थापनका लागि सुरक्षा कडा पारिएको छ भने स्वयंसेवक परिचालन गरिएको छ ।
यद्यपि, सरकारले पर्यटकीय क्षेत्र घोषणा गरे पनि पर्याप्त विकास नभएको भन्दै सरोकारवालाले एकीकृत गुरुयोजनाको आवश्यकता औंल्याएका छन् ।
