काठमाडौं, ३० चैत । नेपाली कांग्रेसले आफ्नो कार्यसम्पादन समितिको बैठक वैशाख २ गते (बुधबार) बस्ने जनाएका छन् ।
उक्त बैठक आगामी वैशाख ४ गते तय गरिएको संसदीय दलको नेता चयन प्रक्रियाबारे छलफल केन्द्रित हुने बताइएको छ । बैठक पार्टीको केन्द्रीय कार्यालय सानेपामा दिउँसो २ बजे सुरु हुनेछ । संसदीय दलको नेताका लागि अर्जुनरसिंह केसी, भीष्म आङ्देम्बे, मोहन आचार्य र जनकराज गिरीलगायत नेताहरू आकांक्षीका रूपमा देखिएका छन् ।
यसैबीच, केही नेताहरूले नयाँ पुस्ताबाट नेतृत्व चयन हुनुपर्ने धारणा राख्दै निस्कल राईको नाम पनि अघि सारेका छन् । पार्टीका शीर्ष नेताहरूले भने सर्वसम्मत रूपमा संसदीय दलको नेता चयन गर्ने दिशामा छलफल भइरहेको बताए ।
बैठकमा क्रियाशील सदस्यता अद्यावधिक तथा ‘जरामा जाऔं अभियान’बारे पनि छलफल हुने जनाइएको छ । नयाँ वर्षको सुरुआतसँगै कांग्रेसले देशव्यापी रूपमा सदस्यता अद्यावधिक अभियान सञ्चालन गर्ने योजना बनाएको छ भने भोलिदेखि नेताहरूलाई विभिन्न स्थानमा परिचालन गर्दै ‘जरामा जाऔं अभियान’ सुरु गरिने बताइएको छ।
