काठमाडौं, ३० चैत । अमेरिकाले आज -सोमबार-देखि इरान नजिकको रणनीतिक जलमार्ग होर्मुज स्ट्रेटमा नाकाबन्दी गर्ने घोषणा गरेको छ ।
अमेरिकी केन्द्रीय कमान्डका अनुसार साँझदेखि जहाज आवतजावत रोक्ने तयारी गरिएको छ । राष्ट्रपति डोनाल्ड ट्रम्पले नाकाबन्दीको उद्देश्य इरानको तेल निर्यात रोक्नु रहेको बताएका छन् ।
यो घोषणासँगै अन्तर्राष्ट्रिय बजारमा तेलको मूल्य तीव्र रूपमा बढेको छ, जहाँ वेस्ट टेक्सास इन्टरमिडिएट १०४ डलर र ब्रेन्ट क्रुड १०२ डलर प्रतिब्यारेल पुगेको छ ।
यसअघि पाकिस्तानमा २१ घण्टा चलेको अमेरिका–इरान वार्ता निष्कर्षविहीन भएपछि तनाव थप चुलिएको हो । ह्वाइट हाउसले इरानविरुद्ध थप सैन्य विकल्प खुला रहेको जनाएको छ भने युद्धविरामको अवस्था अन्योलमा परेको छ ।
होर्मुज स्ट्रेट विश्वकै महत्वपूर्ण ऊर्जामार्ग हो, जहाँबाट विश्वको ठूलो हिस्सा तेल र ग्यास ओसारपसार हुन्छ । यस क्षेत्रमा तनाव बढ्दा विश्व ऊर्जा बजारमा प्रत्यक्ष असर परेको छ ।
