एजेन्सी । अमेरिका र इरानबीच इस्लामाबादमा २१ घण्टासम्म चलेको वार्ता निष्कर्षविहीन बनेपछि अमेरिकी उपराष्ट्रपति जेडी भान्स आफ्नो टोलीसहित आइतबार स्वदेश फर्किएका छन्।
पत्रकार सम्मेलनमा उनले इरानले अमेरिकी सर्त स्वीकार नगरेकाले सम्झौता हुन नसकेको बताए। अमेरिकाले इरानसँग आणविक हतियार विकास नगर्ने स्पष्ट प्रतिबद्धता मागेको थियो।
इरानले भने अमेरिकी सर्त अत्यन्त कडा भएकाले सहमति हुन नसकेको प्रतिक्रिया दिएको छ। दुई देशबीच युद्धविरामपछि स्थायी समाधान खोज्न पाकिस्तानको मध्यस्थतामा वार्ता भएको थियो।
युद्धविरामपछि पनि इजरायलले लेबननमा आक्रमण जारी राखेपछि तनाव बढ्दै गएको थियो।
साथै, गत फेब्रुअरीमा अमेरिका र इजरायलको संयुक्त हवाई आक्रमणपछि मध्यपूर्वमा द्वन्द्व अझ चर्किएको छ।
