काठमाडौं, २७ चैत । सम्पत्ति शुद्धीकरण अनुसन्धानका क्रममा पक्राउ परेका पूर्वमन्त्री तथा नेपाली कांग्रेसका नेता दीपक खड्काको बन्दीप्रत्यक्षीकरण रिटमाथि आज सर्वोच्च अदालतमा सुनुवाइ हुने भएका छन् ।
कामु प्रधानन्यायाधीश सपना प्रधान मल्ल र न्यायाधीश मेघराज पोखरेलको संयुक्त इजलासमा उक्त रिटको पेसी तोकिएको छ । खड्कालाई गैरकानुनी रूपमा हिरासतमा राखिएको दाबी गर्दै उनकी पत्नी विनीता थापाले सर्वोच्च अदालतमा बन्दीप्रत्यक्षीकरण रिट दर्ता गराएकी थिइन् ।
यसअघि न्यायाधीशद्वय महेश शर्मा पौडेल र सुनिलकुमार पोखरेलको इजलासले उनलाई हिरासतमा राख्नुको आधार र सम्बन्धित कागजात पेश गर्न आदेश दिएको थियो । सम्पत्ति शुद्धीकरण अनुसन्धान विभागले भने काठमाडौँ जिल्ला अदालतबाट म्याद थप गर्दै खड्कामाथि अनुसन्धान जारी राखेको छ ।
सर्वोच्च अदालतले विभागलाई लिखित जवाफ पेश गर्न समयसीमा दिएको थियो, र सो जवाफ प्राप्त भएपछि आजका लागि अन्तिम सुनुवाइको पेसी तय गरिएको हो ।
