काठमाडौं, २७ चैत । नेपाल आयल निगमले अन्तर्राष्ट्रिय बजारमा मूल्य वृद्धि भएको भन्दै पेट्रोलियम पदार्थको भाउ पुनः बढाएको छ ।
गयराति १२ बजेदेखि लागू हुनेगरी पेट्रोल प्रतिलिटर १७ रुपैयाँ तथा डिजेल र मट्टितेल प्रतिलिटर २५ रुपैयाँले महँगो बनाइएको छ ।
खाना पकाउने एलपी ग्यासमा प्रतिसिलिन्डर १०० रुपैयाँ वृद्धि गरिएको छ भने आन्तरिक हवाई इन्धनमा प्रतिलिटर ६ रुपैयाँ बढाइएको छ ।
नयाँ मूल्यअनुसार काठमाडौंमा पेट्रोल २१९, डिजेल/मट्टितेल २०७ र एलपी ग्यास २०१० रुपैयाँ पुगेको छ । करमा छुट दिँदा पनि घाटा कायम रहेकाले मूल्य बढाउनुपरेको निगमले जनाएको छ।
मूल्यवृद्धिपछि पनि निगमलाई पाक्षिक रूपमा करिब ७ अर्ब ८१ करोड घाटा हुने दाबी गरिएको छ ।
