जनकपुर, २६ चैत । धनुषाको जनकपुर–१४ मुजेलियाकी २५ वर्षीया रुबी कुमारी ठाकुर दुई महिनाअघि मात्र राजनीतिमा प्रवेश गरेर प्रतिनिधिसभा सदस्य बनेकी हुन् र अहिले उपसभामुख बन्ने तयारीमा छन् ।
सामान्य परिवारबाट आएकी रुबी श्रम संस्कृति पार्टीमा हर्क साम्पाङको कामबाट प्रभावित भएर जोडिएकी थिइन् । निर्वाचनअघि घरदैलो अभियानमा सक्रिय रहेकी उनलाई समानुपातिक सूचीबाट सांसद बनेको खबर नै अप्रत्याशित थियो ।
अहिले उनी मधेसका दाइजो प्रथा, बालविवाह र बेरोजगारीजस्ता समस्यामा काम गर्ने प्रतिबद्धता व्यक्त गर्छिन् । इन्जिनियरिङ डिप्लोमा पूरा गरेकी रुबीले सांसदको जिम्मेवारीसँगै अध्ययनलाई निरन्तरता दिने योजना बनाएकी छन् ।
उनले आगामी पाँच वर्ष जनताको सेवामा केन्द्रित हुने र विवाहबारे अहिले सोच नराखेको बताएकी छन् ।
