घरेलु मैदानमै बार्सिलोना पराजित, १० खेलाडीमा सीमित हुँदा असर

काठमाडौं, २६ चैत । युईएफए च्याम्पियन्स लिगअन्तर्गत क्वाटरफाइनलको पहिलो लेगमा बार्सिलोना घरेलु मैदानमै एथ्लेटिको म्याड्रिडसँग २–० ले पराजित भएको छ ।

एक खेलाडीले कम खेलेको अवस्थामा बार्सिलोनाले संघर्षपूर्ण प्रदर्शन गरे पनि हार टार्न सकेन । सन् २००६ पछि नोउ क्याम्पमा जित निकाल्न नसकेको एथ्लेटिकोले यसपटक प्रभावशाली खेल प्रस्तुत गर्दै महत्वपूर्ण नतिजा निकालेको हो,

जसले सेमिफाइनल पुग्ने सम्भावना बलियो बताए । एथ्लेटिकोको जितमा जुलियन अल्भारेज र अलेक्जेन्डर सोर्लोथले एक–एक गोल गरेका छन् । खेलको पहिलो हाफको अन्त्यतिरको घटना निर्णायक मोड बन्यो । बार्सिलोनाका डिफेन्डर पाउ कुबार्सीले जुलियानो सिम्योनीलाई फल गरेपछि रेफ्री इस्तभान कोभाक्सले सुरुमा पहेँलो कार्ड दिएका थिए ।

तर समीक्षा पछि उनलाई रातो कार्ड दिइयो, जसले बार्सिलोनालाई १० खेलाडीमा सीमित बनायो । त्यही फ्री–किक अवसरलाई सदुपयोग गर्दै जुलियन अल्भारेजले सुन्दर गोल गर्दै एथ्लेटिकोलाई अग्रता दिलाए ।

दोस्रो हाफमा १० खेलाडीमा सीमित बार्सिलोनाले दबाब बनाउँदै आक्रमण जारी राख्यो । मार्कस रासफोर्डले उत्कृष्ट अवसर पाए पनि उनको प्रहार क्रसबारमा लागेर फर्किएको थियो । समग्रमा बार्सिलोनाले २४ पटक गोल प्रयास गरे पनि सफल हुन सकेन ।

खेलको अन्तिम समयमा एथ्लेटिकोले काउन्टर अट्याकमा अर्को गोल थप्यो। माटेओ रुगेरीको क्रसमा अलेक्जेन्डर सोर्लोथले गोल गर्दै टोलीको जित पक्का गरे । लगातार आठ खेलसम्म अपराजित रहेको बार्सिलोनाका लागि यो हार ठूलो धक्का बनेको छ।

अब दोस्रो लेगका लागि म्याड्रिडमा हुने खेलमा पुनरागमन गर्न उसलाई कठिन चुनौती सामना गर्नुपर्नेछ । एथ्लेटिकोले यसअघि पनि च्याम्पियन्स लिगको नकआउट चरणमा बार्सिलोनालाई दुई पटक बाहिर पठाइसकेको छ ।