महोत्तरी, २५ चैत। महोत्तरीको मटिहानीस्थित लक्ष्मीनारायण मठका मान महन्थ जगन्नाथ दास वैष्णवलाई बैंकिङ कसूर मुद्दामा प्रहरीले पक्राउ गरेको छ।
धनुषाका दीपेन्द्र ठाकुरको जाहेरीका आधारमा करिब १ करोड ३० लाख रुपैयाँ बराबरको आर्थिक अनियमितता आरोपमा उनलाई नियन्त्रणमा लिइएको हो।
फरार रहेका वैष्णवलाई आफ्नै निवासबाट पक्राउ गरी थप अनुसन्धानका लागि जिल्ला प्रहरी कार्यालय, धनुषा पठाइएको छ।
उनीविरुद्ध वित्तीय अनियमितता, विश्वासघात तथा बैंकिङ प्रणाली दुरुपयोगसम्बन्धी अनुसन्धान भइरहेको प्रहरीले जनाएको छ।
यसअघि पनि वैष्णव ७० लाख रुपैयाँ कीर्ते प्रकरणमा पक्राउ परेर सजाय भोगिसकेका थिए। सोही प्रकरणमा बैंक खातासमेत रोक्का राखिएको छ भने सरकारी हस्ताक्षर कीर्ते गरी रकम झिकेको आरोप पनि लागेको थियो।
साथै, रुपन्देहीस्थित धार्मिक जग्गा बिक्री प्रकरणमा समेत उनीविरुद्ध उजुरी परेको छ।
