काठमाडौं, २५ चैत । अमेरिका र इरान बीच स्ट्रेट अफ हर्मुज पुन : सञ्चालन गर्ने सर्तमा दुई हप्ताको युद्धविराम भएपछि विश्व ऊर्जा बजारमा सकारात्मक संकेत देखिएको छ ।
युद्धविरामको सहमतिसँगै अन्तर्राष्ट्रिय बजारमा कच्चा तेलको मूल्य घटेको छ । ब्रेन्ट क्रुड करिब १५.९ प्रतिशतले घटेर प्रति ब्यारेल ९२.३० डलरमा पुगेको छ भने अमेरिकन क्रुड पनि १६.५ प्रतिशतले घट्दै ९३.८० डलरमा झरेको छ ।
यद्यपि मूल्य अझै द्वन्द्वअघिको स्तरभन्दा माथि नै रहेको छ । यसअघि इरानले जलमार्ग हुँदै जाने जहाजमाथि आक्रमणको चेतावनी दिएपछि तेल ग्यास आपूर्ति अवरुद्ध भई मूल्य चुलिएको थियो ।
युद्धविरामको खबरसँगै एशिया प्रशान्त क्षेत्रका शेयर बजारमा पनि उत्साह देखिएको छ । ऊर्जा संकटले एशियाली मुलुकहरूलाई प्रभाव पारेको छ ।
फिलिपिन्स ले ऊर्जा संकटकाल घोषणा गरिसकेको छ भने महँगो जेट इन्धनका कारण हवाई सेवा प्रभावित बनेका छन् ।
