जनकपुर, १७ चैत । जनकपुरमा पछिल्लो समय बढ्दै गएको फुटपाथ अतिक्रमण नियन्त्रण गर्न मधेश प्रदेश सरकार सक्रिय रूपमा जुटेको छ ।
यसैक्रममा गृह, सञ्चार तथा कानुनमन्त्री फकिरा महतोको नेतृत्वमा जनकपुरको अत्यन्त व्यस्त मानिने पेठिया बजार क्षेत्रमा फैलिएको अवैध फुटपाथ अतिक्रमण हटाउने अभियान सञ्चालन गरिएको हो ।
अभियानअन्तर्गत बजार क्षेत्रमा वर्षौंदेखि अनियन्त्रित रूपमा फैलिएका पसल, टहरा तथा अस्थायी संरचनाहरू डोजर प्रयोग गरेर हटाइएको छ ।
सडक किनार तथा पैदलमार्गमा राखिएका सामानहरूका कारण सर्वसाधारणलाई आवतजावतमा समस्या भइरहेको गुनासो बढेपछि सरकारले कडा कदम चालेको हो । स्थानीय प्रशासन र सुरक्षाकर्मीको उपस्थितिमा सञ्चालन गरिएको उक्त अभियानमा फुटपाथ अतिक्रमण हटाइएपछि पैदलयात्रु तथा सवारीसाधनलाई सहज आवागमन हुने विश्वास गरिएको छ ।
मन्त्री महतोले सार्वजनिक स्थान अतिक्रमण गरेर व्यापार गर्ने प्रवृत्ति सह्य नहुने बताउँदै नियम उल्लंघन गर्नेहरूमाथि आवश्यक कारबाही गरिने चेतावनी दिएका छन् ।
उनले यस अभियानलाई निरन्तरता दिइने र जनकपुरका अन्य क्षेत्रमा समेत क्रमशः अतिक्रमण हटाइने जानकारी दिए । साथै, व्यवस्थित बजार व्यवस्थापनका लागि वैकल्पिक स्थानको व्यवस्था गर्न सम्बन्धित निकायसँग समन्वय भइरहेको पनि उनले बताए ।
स्थानीय बासिन्दा तथा व्यवसायीहरूले भने यस अभियानप्रति मिश्रित प्रतिक्रिया दिएका छन् । कतिपयले बजार व्यवस्थित हुने अपेक्षा व्यक्त गरेका छन् भने केही व्यवसायीले वैकल्पिक व्यवस्था नगरी हटाइनु अन्यायपूर्ण भएको बताएका छन् ।
प्रदेश सरकारले सार्वजनिक स्थानको संरक्षण, सुन्दर शहर निर्माण र ट्राफिक व्यवस्थापनलाई ध्यानमा राख्दै यस्तो अभियानलाई अझ कडाइका साथ अगाडि बढाउने जनाएको छ ।
