जनकपुर, १ चैत । हुलाकी राजमार्ग अन्तर्गत जनकपुरतर्फ आउने सडकमा टिपरको लापरवाहीपूर्ण सञ्चालनका कारण दुर्घटनाको जोखिम बढ्दै गएको देखिएको छ ।
आइतबार रम्दैया क्षेत्रबाट जनकपुरतर्फ आउँदै गरेको एक टिपरले अत्यधिक बालुवा लोड गरी ओभरस्पिडमा चल्दा एक पत्रकार दुर्घटनाबाट बालबाल जोगिएका छन् ।
प्रत्यक्षदर्शीका अनुसार टिपरमा अत्यधिक बालुवा लोड गरिएको थियो र बालुवाबाट पानी समेत चुहिँदै थियो । त्यसै अवस्थामा तीव्र गतिमा कुदाइएको टिपरका कारण सडकमा हिँडिरहेका पत्रकार प्रवेश साह दुर्घटनाबाट झन्डै जोगिएका हुन् ।
स्थानीयले जनकपुर क्षेत्रमा टिपरहरू ओभरलोड बालुवा बोकेर तीव्र गतिमा कुदाउने समस्या बढ्दै गएको बताएका छन् । यस्ता गतिविधिले सडक प्रयोगकर्ताको ज्यान जोखिममा परेको उनीहरूको गुनासो छ ।
यता, यस्तो जोखिमपूर्ण अवस्थामा पनि प्रहरी प्रशासन मौन देखिएको भन्दै स्थानीयले आक्रोश व्यक्त गरेका छन् । टिपरहरूको ओभरलोड र तीव्र गतिमा चलाउने प्रवृत्ति नियन्त्रण गर्न सम्बन्धित निकायले प्रभावकारी कदम चाल्नुपर्ने माग गरिएको छ ।
