जनकपुर, २९ फागुन। मधेश प्रदेशको धार्मिक तथा सांस्कृतिक केन्द्रका रूपमा चिनिने जनकपुर शहरमा सार्वजनिक सडक र सडक पेटीमै पैसा तिरेर व्यापार गर्ने प्रवृत्ति बढ्दै गएको पाइएको छ।
विशेषगरी जनकपुरको पेठिया बजार क्षेत्रमा व्यापारीहरूले सडक तथा सडक पेटीलाई निजी स्वामित्वझैँ प्रयोग गर्दै व्यापार सञ्चालन गरिरहेको दृश्य सर्वसाधारणले देखिरहेका छन्।
स्थानीयका अनुसार उक्त क्षेत्रमा कतिपय व्यापारीले अनौपचारिक रूपमा रकम तिरेर सडक र फुटपाथको भाग ‘किनेजस्तै’ गरी पसल राख्ने वा व्यापार गर्ने व्यवस्था मिलाएको आरोप लागिरहेको छ।
सार्वजनिक प्रयोगका लागि बनाइएका सडक तथा पेटीमा यसरी व्यापार विस्तार हुँदा पैदलयात्रीलाई हिँडडुल गर्न कठिनाइ भएको गुनासो पनि बढ्दै गएको छ।
जनकपुर धार्मिक पर्यटनका दृष्टिले महत्त्वपूर्ण शहर हो। यहाँ दैनिक रूपमा हजारौँ श्रद्धालु र पर्यटकको आवागमन हुन्छ।
तर बजार क्षेत्रमा सडक र पेटीमा अनियन्त्रित व्यापार हुँदा यातायात व्यवस्थापन अव्यवस्थित बन्ने, जाम बढ्ने र सर्वसाधारणलाई असहज हुने समस्या देखिएको स्थानीय बासिन्दाको भनाइ छ।
स्थानीयले यस विषयमा सम्बन्धित निकायले चासो दिनुपर्ने माग गरेका छन्। सार्वजनिक सडक तथा फुटपाथलाई व्यक्तिगत प्रयोगका लागि ‘बेचबिखन’ भएको जस्तो देखिने अवस्थाले नगर व्यवस्थापनमाथि नै प्रश्न उठाएको उनीहरूको भनाइ छ।
यदि साँच्चै रकम लिएर सडक पेटीमा व्यापार गर्न दिइएको हो भने त्यसबारे स्पष्टता आउनुपर्ने र गलत अभ्यास भएमा तत्काल रोक लगाउनुपर्ने माग गरिएको छ।
सार्वजनिक सम्पत्तिको संरक्षण तथा व्यवस्थित बजार व्यवस्थापनका लागि नगरपालिकाले प्रभावकारी अनुगमन गर्नुपर्ने आवश्यकता देखिएको स्थानीयले बताएका छन्।
अन्यथा, धार्मिक तथा ऐतिहासिक पहिचान बोकेको जनकपुर शहरमा यस्ता गतिविधिले शहरको छवि नै धूमिल बनाउने उनीहरूको चेतावनी छ।
