काठमाडौं, २९ फागुन । विभागीय टोली एपीएफ क्लबले राष्ट्रिय लिग फुटबलमा बिहीबार त्रिभुवन आर्मी क्लबमाथि १–० को महत्त्वपूर्ण जित निकालेका छन् ।
यो जितले एपीएफको प्रतियोगितामा अपराजित यात्रा मात्र कायम रहेन, उपाधिका लागि साँच्चिकै बलियो प्रत्याशी पनि बनेको छ । हारले आर्मी उपाधिको हकदार नरहेको देखिएको छ । आर्मीको यो १० खेलमा दोस्रो हार हो । आर्मीले चर्च ब्वाइजसँगको खेलमा पनि पराजय भोगेको थियो ।
जितसँगै एपिएफ १० खेलमा २४ अंक जोड्दै शीर्ष स्थानमा उक्लियो । समान खेलमा २० अंक जोड्दै आर्मी चौथो स्थानमा छ । दिनको दोस्रो खेलमा मिडफिल्डर कृष्ण बहादुर आलेको निर्णायक गोलमा संकटा एफसीले श्री भगवती क्लबविरुद्ध १–० को संघर्षपूर्ण जित हासिल गर्यो ।
यो खेल पनि दशरथ रंगशालामै भएको थियो । जितसँगै १० खेलमा १३ अंक जोड्दै संकटा अंकतालिकाको नवौं स्थानमा उक्लियो भने समान खेलमा भगवती ८ अंकका साथ १३औं स्थानमा छ । दिनको पहिलो खेलमा पुछारबाट दोस्रो स्थानमा रहेको काँक्रे बिहार क्लबलाई २–१ ले हराउँदै चर्च ब्वाइज युनाइटेड तालिकाको दोस्रो स्थानमा छ ।
सातदोबाटोस्थित एन्फा मुख्यालय मैदानमा चर्च ब्वाइजलाई जित दिलाउन दुबै गोल रिचर्ड विल्सनले गरे । २–० ले पछाडि परेको अवस्थामा काँक्रे बिहारका लागि सुदेन विक्रम विश्वकर्माले गोल गरेका थिए । जितसँगै ९ खेलमा २२ अंक जोडेको छ । काँक्रे बिहारको यो आठौं हार हो ।
समान खेलमा काँक्रे बिहारले मात्र एक अंक जोडेको छ । आज लिगमा तीन खेल हुनेछन्। पहिलो खेलमा प्लानिङ ब्वाइज युनाइटेड र चित्लाङ एफसीबीच प्रतिस्पर्धा हुनेछ । त्यस्तै दोस्रो खेलमा नेपाल पुलिस क्लब र मछिन्द्र एफसी आमने–सामने हुनेछन् । अन्तिम खेलमा लालिगुराँस एसोसिएसनले मनाङ मस्र्याङ्दीसँग खेल्नेछ ।
