काठमाडौं, ६ फाल्गुन । बनेपामा टिपरको ठक्करबाट ज्यान गुमाउने स्कुटर चालकको सनाखत भएको छ ।
मृतक काभ्रेको धुलिखेल नगरपालिका–८ घर भई हाल धुलिखेल–५ बस्दै आएका अन्दाजी ३१ वर्षीय ओमन प्रधान रहेको जिल्ला प्रहरी कार्यालय काभ्रेले जनाएको छ ।
बुधबार बिहान चाँदनी चोकमा भएको दुर्घटनामा स्कुटर चालकको घटनास्थलमै मृत्यु भएको थियो । दुर्घटनामा संलग्न टिपर चालक सिन्धुपालचोकका ३२ वर्षीय दिपक रोक्कालाई प्रहरीले पक्राउ गरेको छ ।
मृतकको शव सिर मेमोरियल अस्पतालमा राखिएको छ । दुर्घटनापछि आक्रोशित स्थानीयले टिपरमा आगजनी गर्दा केहीबेर अवस्था तनावग्रस्त भई अरनिको राजमार्ग अवरुद्ध भएको थियो ।
अहिले आगजनी भएको सवारी हटाइएपछि यातायात सुचारु भएको प्रहरीले जनाएको छ ।
