जनकपुर, ३० पुस । जनकपुरमा पछिल्लो समय टिपर र भारी सवारीसाधनका कारण दुर्घटनाको श्रृंखला बढ्दै गएको छ ।
बुधबार बिहान जनकपुरको व्यस्त रामानन्दचोकमा टिपरले ठक्कर दिँदा एक युवती गम्भीर घाइते भएकी छन् । उनको अवस्था अत्यन्तै नाजुक रहेको र ज्यान जोखिममा रहेको चिकित्सकहरूले बताएका छन् ।
यसैदिन जनकपुरकै मिल्स एरियामा भएको अर्को दुर्घटनामा एक जनाको मृत्यु भएको छ । लगातार भइरहेको यस्ता घटनाले जनकपुरमा ट्राफिक व्यवस्थापनप्रति गम्भीर प्रश्न उठाएको छ ।
सहरभित्र जथाभावी रूपमा चलाइने टिपर, ट्रक र भारी सवारी साधन दुर्घटनाको मुख्य कारण बनेका स्थानीयवासीहरुले बताउछन ।
दुर्घटना बढिरहे पनि ट्राफिक प्रहरी, जनकपुर उपमहानगरपालिका तथा उद्योग वाणिज्य संघले प्रभावकारी व्यवस्थापन गर्न नसकेको आरोप लागेको छ ।
जनकपुरका अधिकांश चोक–चोकमा सडकपेटी र सार्वजनिक स्थान अतिक्रमण गरी व्यवसाय सञ्चालन भइरहेको छ, जसले पैदलयात्रीलाई सडकमा हिँड्न बाध्य बनाएको छ ।
स्थानीयहरूका अनुसार ठूला भू–माफियाले हजारौँ बिघा जमिन कब्जा गर्दा सम्बन्धित निकाय मौन छन् भने साना व्यापारीहरूले सडक नै कब्जा गरेर व्यापार गर्न पाउने अवस्था बनेको छ ।
यस्ता बेथिति रोक्नुपर्ने जिम्मेवारीमा रहेका नगर नेतृत्व र उद्योग वाणिज्य संघ नै मौन बस्दा जनकपुरमा सडक दुर्घटना दिनप्रतिदिन बढ्दै गएको स्थानीयको गुनासो छ ।
