काठमाडौं, २५ पुस । जाजरकोटको छेडागाड नगरपालिका–८ नाउरिघाट नजिक बोलेरो दुर्घटना हुँदा दुई जनाको मृत्यु भएको छ ।
शुक्रबार बिहान छेडागाड–९ पजारुबाट थलहका लागि छुटेको कर्णाली प्रदेश ०२–००१ च १३२७ नम्बरको डबल क्याब बोलेरो दुर्घटनामा परेको हो ।
दुर्घटनामा ७० वर्षीया नन्दकला अधिकारी र २८ वर्षीय राजु अधिकारीको घटनास्थलमै मृत्यु भएको प्रहरीले जनाएको छ ।
चालकसहित चार जना घाइते भएका छन्, जसको अवस्था मध्यम रहेको र उपचारका लागि अस्पताल लगिएको जिल्ला प्रहरी कार्यालय जाजरकोटले जानकारी दिएको छ ।
