झापा, १९ पुष । भद्रपुर विमानस्थलमा शुक्रबार राति अवतरणका क्रममा बुद्ध एयरको एटीआर–७२ विमान रन–वे पार गरी दुर्घटना हुँदा को–पाइलटसहित सात जना सामान्य घाइते भएका छन् ।
काठमाडौंबाट भद्रपुरका लागि उडेको कलसाइन ९०१ रहेको उक्त विमान राति ९ः१० बजे अवतरण गर्ने क्रममा रन–वेको पूर्वतर्फ करिब ३०० मिटर ओभर रन भई घाँसे झाडी र माटोमा भासिएको जिल्ला प्रहरी कार्यालय झापाले जनाएको छ । विमानमा ५१ जना यात्रु, चार जना चालक दल र एक जना इन्जिनियर सवार थिए ।
दुर्घटनामा ललितपुर निवासी २४ वर्षीय को–पाइलट सुशान्त श्रेष्ठ र अन्य छ जना यात्रु घाइते भएका हुन् । सबै घाइतेलाई तत्काल उद्धार गरी भद्रपुरस्थित ओमसाई पाथिभरा अस्पताल लगिएको थियो । को–पाइलट श्रेष्ठको उपचार भइरहेको छ भने अन्य छ जना सामान्य उपचारपछि डिस्चार्ज भइसकेका छन् ।
दुर्घटनाको कारणबारे थप अनुसन्धान भइरहेको प्रहरीले जनाएको छ ।
