काठमाडौ, ८ पुस । राष्ट्रिय सभा सदस्य निर्वाचनका लागि प्रदेशगत मतभार सार्वजनिक भएका छन् ।
निर्वाचन आयोगका अनुसार मधेश प्रदेशको कुल मतभार १० हजार ८३९ रहेको छ । मधेश प्रदेशमा १०७ प्रदेश सभा सदस्य र १३६ स्थानीय तहका २७२ जना प्रमुख तथा उपप्रमुख मतदाता छन् ।
प्रदेश सभातर्फको मतभार ५,६७१ र स्थानीय तहतर्फको मतभार ५,१६८ छ । प्रदेश सभामा दलगत प्रतिनिधित्व अनुसार एमालेका २५, कांग्रेसका २२, जसपा नेपालका १९, जनमत पार्टीका १३, लोकतान्त्रिक समाजवादी पार्टी (लोसपा) का ९, माओवादी केन्द्रका ९, नेकपा एकीकृत समाजवादीका ७ तथा नागरिक उन्मुक्ति पार्टी, राप्रपा र संघीय समाजवादी पार्टीका एक–एक जना सांसद छन् ।
कुल मतभारको आधारमा कांग्रेस सबैभन्दा अगाडि छ भने त्यसपछि एमाले र जसपा नेपाल क्रमशः दोस्रो र तेस्रो स्थानमा छन् । माओवादी केन्द्र र एकीकृत समाजवादी मिलेर बनेको कम्युनिस्ट समूह चौथो स्थानमा रहे पनि ठूला दलको तुलनामा मतभार निकै कम छ ।
यस कारण राष्ट्रिय सभा निर्वाचनमा ठूला दलहरू एक्लाएक्लै प्रतिस्पर्धा गरे पनि साना दलहरूको समर्थन अनिवार्य देखिन्छ । विशेषगरी जसपा नेपाल, जनमत पार्टी, लोसपा, माओवादी केन्द्र र एकीकृत समाजवादी निर्णायक भूमिकामा रहने विश्लेषण गरिएको छ ।
राष्ट्रिय सभा सदस्यको निर्वाचन आगामी माघ ११ गते हुने भएको छ ।
निर्वाचन आयोगले सार्वजनिक गरेको कार्यतालिका अनुसार पुस १९ गते मतदाता नामावली प्रकाशन गरिनेछ । दाबी–विरोधमाथि छानबिनपछि पुस २२ गते अन्तिम मतदाता नामावली प्रकाशन हुनेछ ।
पुस २३ गते उम्मेदवारको मनोनयन दर्ता, पुस २४ गते उजुरी दर्ता, पुस २७ गते नाम फिर्ता तथा अन्तिम नामावली प्रकाशन हुनेछ । उम्मेदवारहरूले पुस २८ गते निर्वाचन चिन्ह प्राप्त गर्नेछन् ।
मतदान माघ ११ गते बिहान ९ बजेदेखि दिउँसो ३ बजेसम्म सम्बन्धित मतदान केन्द्रमा हुनेछ ।
