जनकपुर, ७ मङ्सिर। जनकपुरमा सम्पन्न तीन दिवसीय स्वास्थ्य क्षेत्रको वार्षिक समीक्षा कार्यक्रममा मधेश प्रदेशका मुख्यमन्त्री सरोज कुमार यादवले प्रदेशको समग्र स्वास्थ्य अवस्था सुधारका लागि नयाँ स्वास्थ्य नीति बनाउन विज्ञहरूलाई आग्रह गरेका छन्।
उनले स्वास्थ्य नीतिको निर्माणमा प्रदेश सरकारबाट पूर्ण साथ रहने बताउँदै तीनै तहको सरकारबीच सहकार्य आवश्यक रहेको उल्लेख गरे।
कार्यक्रममा मधेश प्रदेशका १३६ पालिकामध्ये उत्कृष्ट स्वास्थ्य कार्यक्रम सञ्चालन गर्ने पालिकाहरूलाई सम्मान गरिएको थियो।
पहिलो स्थान सर्लाहीको लालबन्दी नगरपालिका, दोस्रो स्थान हरिपुर नगरपालिका र तेस्रो स्थान विष्णुपुर गाउँपालिकाले प्राप्त गरे।
प्रादेशिक अस्पतालतर्फ गौर अस्पताल प्रथम, जलेश्वर अस्पताल दोस्रो र सिरहा अस्पताल तेस्रो बने। स्वास्थ्य कार्यालयतर्फ पर्सा प्रथम, सर्लाही द्वितीय र महोत्तरी तृतीय स्थानमा रहे। आयुर्वेदतर्फ पनि पर्सा प्रथम, बारा द्वितीय र महोत्तरी तृतीय बने।
संस्थागत अस्पतालतर्फ बर्दिबास अस्पताल प्रथम स्थानमा रहँदै सम्मानित भयो। सबै विजेताहरूलाई मुख्यमन्त्री यादवले दोसल्ला र सम्मानपत्र प्रदान गरेका थिए।
कार्यक्रममा स्वास्थ्य क्षेत्रका विज्ञ, दातृ निकाय, तथा विभिन्न स्वास्थ्य संस्थाका प्रमुखहरूको सहभागिता रहेको थियो।
