काठमाडौं, १९ कात्तिक । राष्ट्रिय स्वतन्त्र पार्टी (रास्वपा)का सभापति रवि लामिछानेलाई उच्चस्तरीय जाँचबुझ आयोगले बयानका लागि नख्खु कारागारबाट सिंहदरबार ल्याएको छ ।
आयोगले लामिछानेलाई सिंहदरबारस्थित कार्यालयमा उपस्थित हुन बोलाएर ‘जेनजी आन्दोलन’का क्रममा उनी नख्खु कारागारबाट बाहिर निस्किएको घटनाबारे बयान लिएको हो । उक्त आयोगको नेतृत्व गौरीबहादुर कार्कीले गरिरहेका छन् ।
सहकारी संस्थाको रकम हिनामिना प्रकरणमा मुछिएका लामिछाने पुर्पक्षका लागि कारागारमा रहेका बेला २४ भदौमा असुरक्षाको कारण देखाउँदै अन्य कैदीबन्दीसँगै बाहिर निस्किएका थिए ।
तर, कारागार प्रशासनले लामिछानेलाई बाहिर पठाउन जारी गरेको भनिएको पत्रको वैधानिकता र औपचारिकतामाथि प्रश्न उठेको थियो । त्यसपछि लामिछाने पुनः कारागार फर्किएका थिए ।
आयोगको टोलीले गत सोमबार नख्खु कारागार पुगेर २४ भदौमा भएको घटनाको वस्तुस्थिति अध्ययन गरेको थियो । त्यसको अघिल्लो दिन आयोगले कारागारका प्रमुख सत्यराज जोशीसँग पनि बयान लिएको थियो ।
