काठमाडौं, ९ कात्तिक । महाराजगन्जमा जेनजी आन्दोलनका क्रममा दुई प्रहरीको मृत्यु भएको घटनामा संलग्न प्रहरीले थप पाँच जना व्यक्तिलाई नियन्त्रणमा लिएको छ ।
प्रहरी वृत्त महाराजगन्जमा कार्यरत असई मिलन राय र जवान उत्तम थापाको ज्यान गएपछि गरिएको विस्तृत अनुसन्धानका क्रममा नयाँ नामहरू सार्वजनिक भएका हुन् । प्रहरीले पक्राउ गरेका मध्ये गोरखा, तनहुँ, सर्लाही र रामेछापका युवा रहेका छन् ।
पक्राउ पर्नेहरूमा गोरखा घर भएका सोम गुरुङ, तनहुँका राजीव गुरुङ, युनिक श्रेष्ठ, सर्लाहीका सुमित तितुङ र रामेछापका दीपक मगर रहेका छन्। उनीहरू अहिले भद्रकालीस्थित जिल्ला प्रहरी परिसर, काठमाडौंमा हिरासतमा रहेका छन् ।
प्रारम्भिक अनुसन्धानअनुसार, उनीहरू आन्दोलनको भीडमा मिसिएर प्रहरीमाथि आक्रमणमा सहभागी भएको देखिएको छ । अनुसन्धान अधिकारीहरूको भनाइमा, उनीहरूले असई राय र जवान थापामाथि कुटपिट गरी हत्या गरेको प्रमाण फेला परेको छ ।
काभ्रेका क्याप्छाकी र मकवानपुरका थिङले जवान उत्तम थापामाथि आक्रमण गरेको प्रमाण फेला परेको प्रहरीले जनाएको छ । त्यस्तै, सिन्धुपाल्चोकका पौडेल र उदयपुरका विकले असई रायमाथि आक्रमण गरेको अनुसन्धान प्रतिवेदनमा उल्लेख छ ।
जिल्ला प्रहरी परिसर, काठमाडौंका एसपी पवन भट्टराईका अनुसार, पछिल्लो चरणमा पक्राउ परेका पाँच जनामाथि अनुसन्धान पूरा गरी पूरक प्रतिवेदन अदालतमा पेश गर्ने तयारी भइरहेको छ । प्रहरीका अनुसार, सुमित तितुङ र दीपक मगरलाई असार ३१ गतेदेखि हिरासतमा राखिएको थियो भने बाँकी तीन जना कार्तिक ३ गते पक्राउ परेका हुन् ।
