काठमाडौं, २० असोज । कर्णाली प्रदेशमा पछिल्ला दुई हप्ताको अवधिमा भएका विभिन्न सडक दुर्घटनामा ६ जनाको मृत्यु भएका छन् ।
मृतक मध्ये चार पुरुष, एक महिला र एक बालक रहेको छ । यस अवधिमा भएका दुर्घटनाबाट १३२ जना घाइते भएका छन् । तीमध्ये ५६ जना गम्भीर घाइते र ७६ जना सामान्य घाइते रहेको प्रदेश प्रहरी कार्यालय सुर्खेतले बताए ।
प्रहरीका अनुसार, चाडपर्व सुरक्षा योजना लागू भएपछि हालसम्म ५१ वटा सडक दुर्घटनामा ६१ सवारी साधन संलग्न भएका छन् । दशैंलगायतका चाडपर्वलाई लक्षित गर्दै प्रदेश प्रहरी कार्यालयले असोज ६ गतेदेखि चाडपर्व सुरक्षा योजना २०८२ कार्यान्वयनमा ल्याएको हो ।
सबैभन्दा बढी दुर्घटना सुर्खेतमा भएका छन् । सुर्खेतमा मात्र १९ दुर्घटनामा एक जनाको मृत्यु र ४३ जना घाइते भएका छन् ।
रुकुम पश्चिममा १० वटा दुर्घटनामा २५ जना घाइते भएका छन् ।
सल्यानमा ६ वटा दुर्घटनामा तीन जनाको मृत्यु र नौ जना घाइते भएका छन् ।
दैलेखमा ४ दुर्घटनामा एक जनाको मृत्यु र २६ जना घाइते भएका छन् ।
जाजरकोटमा पनि ४ दुर्घटनामा एक जनाको मृत्यु र १५ जना घाइते भएको छ ।
कालीकोटमा ३ दुर्घटनामा ५ जना घाइते भएका छन् भने जुम्लामा ४ दुर्घटनामा ८ जना घाइते भएका छन् ।
डोल्पामा एक दुर्घटनामा एक जना घाइते भएका छन् भने मुगु र हुम्ला यस अवधिमा सडक दुर्घटनामुक्त रहेका छन् ।
दशैं सकिन अझै केही दिन बाँकी रहेकाले दुर्घटनाको जोखिम अझै कायम रहेको प्रहरीले बताएको छ । चाडपर्वलक्षित विशेष सुरक्षा योजना कार्यान्वयनका क्रममा प्रदेशभर एक हजार २१८ वटा टोलीमा तीन हजार नौ सय आठ जना प्रहरी परिचालन गरिएको छ ।
सुरक्षा र निगरानी सुदृढीकरणका लागि ५३ वटा मोबाइल गस्ती, ११२ वटा मोटरसाइकल गस्ती, ९२ वटा द्रुत प्रतिकार्य टोली, १७८ वटा पैदल गस्ती र २० वटा लामो तथा छोटो दूरीका प्रहरी गस्ती परिचालन गरिएको छ।
