काठमाडौँ, २० असोज । हालैको अविरल वर्षाबाट उत्पन्न बाढी र पहिरोका कारण देशभरका विभिन्न १९ स्थानमा सडक सम्पर्क अझै पनि पूर्णरूपमा अवरुद्ध भएका छन् ।
तीमध्ये ११ स्थान बागमती प्रदेशमा र ८ स्थान कोशी प्रदेशमा पर्ने छन् । नेपाल प्रहरीका अनुसार बागमती प्रदेशमा पासाङ ल्हामु राजमार्ग, अरनिको राजमार्ग, बीपी राजमार्ग, कान्ति लोकपथ, मदान भण्डारी राजमार्ग, र मध्यपहाडी लोकमार्गका विभिन्न खण्डमा सवारी आवागमन ठप्प छ ।
साथै, नेपाल–चीन सीमा सडक र कुलेखानी–सिस्नेरी–दक्षिणकाली–काठमाडौं सडक खण्ड पनि पूर्णरूपमा बन्द रहेका छन् । त्यसैगरी, कोशी प्रदेशमा कोशी राजमार्ग, सिद्धीचरण राजमार्ग, मध्यपहाडी लोकमार्ग र मेची राजमार्गका विभिन्न भागमा पहिरोका कारण सडक अवरुद्ध भएका छन् ।
प्रहरी र सडक विभागका टोलीहरू अवरोध हटाउने कार्यमा जुटिरहेका भए पनि लगातारको वर्षा र खराब मौसमका कारण काममा कठिनाइ आइरहेको जनाए ।
