काठमाडौं, २० भदौ । मकवानपुरको बकैया गाउँपालिका–५ गरगरेमा शुक्रबार बिहान भएको आगलागीले करिब २ करोड रुपैयाँ बराबरको क्षति पु¥याएको छ ।
आगलागी लिलाराम जिम्बाको दुईतले पक्की घर र किराना पसलबाट सुरु भएको थियो । घर अगाडि बालिएको दियो नजिकै राखिएको पेट्रोलको ड्रम पल्टिँदा आगो सल्किएको प्रारम्भिक अनुसन्धानले देखाएको प्रहरीले बताए ।
आगो निभाउने क्रममा घरधनी ४५ वर्षीय जिम्बा घाइते भएका छन् । उनलाई हेटौंडाबाट थप उपचारका लागि कीर्तिपुरस्थित अस्पताल पठाइएको छ ।
आगलागीमा दुईतले घर पूर्णरूपमा जलेको छ भने नगद १५ लाख, ३० थान ग्यास सिलिन्डर, दुईवटा मोटरसाइकल, खाद्यान्न, अन्नपात, लत्ता–कपडा, फर्निचर लगायतका सामग्री नष्ट भएका छन् ।
इलाका प्रहरी कार्यालय फापरबारी, प्रहरी चौकी हात्तिसुँडे र अस्थायी प्रहरी पोष्ट गरगरेको टोलीसँगै हेटौंडा उपमहानगरपालिका र बागमती गाउँपालिकाका दमकलले संयुक्त प्रयास गरेपछि करिब दुई घण्टापछि आगो नियन्त्रणमा लिन सकिएको हो ।
आगो बिहान ७ः४५ बजे लागेको र ९ः४० बजेतिर मात्र पूर्ण रूपमा नियन्त्रणमा आएको प्रहरीले जनाएको छ ।
