जनकपुर, २३ असार । जनकपुर–जयनगर रेलमार्गमा सोमवार बिहान भएको एक दुखद दुर्घटनामा एक व्यक्तिको ज्यान गएको छ ।
घटना बिहान ९:४० बजे देउरी परवाहा रेल स्टेशनदेखि केही पर पूर्वतर्फ रहेको रेल्वे लिकमा भएको हो । नेपाल रेल्वे सञ्चालनमा रहेको जनकपुर–जयनगर रेल सेवामा कटेर ती व्यक्तिको घटनास्थलमै मृत्यु भएको जनाइएको छ ।
प्रहरी र रेल्वे कर्मचारीका अनुसार मृतक कानमा ईयरफोन लगाएर रेल्वे लिकमा हिँडिरहेका थिए । रेल आउँदै गर्दा चालकले कैयौं पटक हर्न बजाए पनि उनले नसुनेको प्रारम्भिक अनुसन्धानमा खुलेको छ ।
सम्भवतः ईयरफोनका कारण उनी रेलको आवाज वा चेतावनी हर्न सुन्न नसकेको हुनसक्ने अनुमान गरिएको छ । घटनावारे आवश्यक अनुसन्धान अगाडि बढाइएको प्रहरुले जनाइएको छ ।
प्रहरीले शवलाई पोस्टमार्टमका लागि जनकपुर अञ्चल अस्पतालमा पठाएको छ ।
