महोत्तरी, ९ असोज । महोत्तरीको भंगहा नगरपालिका–६ का २४ वर्षीय विवेक सरदारको हत्या प्रकरणमा फरार रहेका आरोपीलाई तत्काल पक्राउ गरी निष्पक्ष अनुसन्धान गर्न बाँतर सरदार समुदायका अगुवाहरूले माग गरेका छन्।
भदौ २६ गते बलवा नगरपालिका–७ बनौटास्थित अशोक ठाकुरको घरको सेफ्टी ट्यांकीमा सरदारको शव टुक्राटुक्रा अवस्थामा फेला परेको थियो। प्रहरीको प्रारम्भिक अनुसन्धानअनुसार विवेक र ठाकुर परिवारकी बुहारी सोनु ठाकुरबीचको सम्बन्धबारे विवाद भएपछि उनलाई घरमै बोलाएर हत्या गरी शव लुकाइएको आशंका गरिएको छ।
घटनामा अशोक ठाकुर, रामकली ठाकुर, सोनु ठाकुरसहित चार जना पक्राउ परिसकेका छन् भने सोनुका श्रीमान् जितेन्द्र ठाकुर फरार रहेको प्रहरीले जनाएको छ।
फरार आरोपीलाई पक्राउ गरी घटनामा संलग्न सबैमाथि कडा कानुनी कारबाहीको माग गर्दै नेपाल बाँतर सरदार समाज कल्याणकारी केन्द्रीय समितिले प्रमुख सहायक जिल्ला अधिकारीमार्फत प्रशासनलाई ज्ञापनपत्र बुझाएको छ। समितिका सहअध्यक्ष सुभाष सरदारले निष्पक्ष र गहिरो अनुसन्धान गरी पीडित परिवारलाई न्याय दिन माग गरेका छन्।
प्रमुख जिल्ला अधिकारी इन्द्रदेव यादवले फरार आरोपीको खोजीका लागि सुरक्षा निकाय परिचालन गरिएको र उनलाई पक्राउ गरी कानुनी प्रक्रिया अघि बढाइने बताएका छन्।
परिवारका अनुसार विवेक भदौ १५ गते घरबाट निस्किएका थिए। त्यसपछि उनको मोबाइल दिउँसो करिब २ बजेबाट बन्द भएको थियो। परिवारले खोजी गर्ने क्रममा ११ दिनपछि उनको शव फेला परेको हो।
