जनकपुर, २६ साउन । नेपाली, मैथिली र हिन्दी भाषाका साहित्यकार, भाषाविद् तथा त्रिभुवन विश्वविद्यालयका पूर्वप्राध्यापक डा. राजेन्द्र विमलको ७९ वर्षको उमेरमा निधन भएको छ ।
मंगलबार बिहान प्रादेशिक अस्पताल जनकपुरमा उपचारका क्रममा उनको निधन भएको परिवारले जनाएको छ । सोमबार राति अचानक अस्वस्थ भएपछि उनलाई अस्पताल लगिएको थियो।
उनको पार्थिव शरीर जनकपुर–१० देवीचोकस्थित निवासमा श्रद्धाञ्जलीका लागि राखिएको छ । आजै दिउँसो ३ बजे स्वर्गद्वारीमा अन्त्येष्टि गरिने परिवारले जनाएको छ । विसं २००३ मा जनकपुरको देवीचोकमा जन्मिएका विमलले किशोरावस्थादेखि नै साहित्य लेखन सुरु गरेका थिए ।
उनले नेपाली र मैथिली भाषामा कथा, कविता, गजल, नाटक तथा समालोचनालगायतका विधामा योगदान दिएका छन् । ‘लङ्का दहन’, ‘रातो पासपोर्ट’, ‘पोस्टमार्टम’, ‘खहरेको तिर्खा’ इतिहासक घाओ’ पचास वर्ष मैथिली कथा’लगायत उनका चर्चित कृति हुन् ।
उनका रचनामा जनकपुर, मिथिला र मधेशको सामाजिक जीवन, राजनीतिक विकृति, विभेद, गरिबी तथा सीमान्तकृत समुदायका आवाज प्रमुख रूपमा प्रस्तुत भएका छन् ।
विमलले विसं २०२९ देखि लामो समय त्रिभुवन विश्वविद्यालयमा नेपाली विषय अध्यापन गरेका थिए । पद्मकन्या क्याम्पस, महेन्द्र मोरङ क्याम्पस र रामसागर रामस्वरूप क्याम्पस जनकपुरमा समेत अध्यापन गरेका उनले भाषाविज्ञानमा विद्यावारिधि गरेका थिए ।
नेपाली साहित्यमा पु¥याएको योगदानका लागि उनलाई ‘जगदम्बा-श्री २०६६’ र ‘मधुपर्क सम्मान २०७६’ लगायतका सम्मान प्राप्त भएका थिए ।
