जनकपुर, ११ साउन । मधेश प्रदेशका खेलकुद तथा समाज कल्याण मन्त्री लखन दास तत्माले सुनसरीको देवानगञ्जमा भएको घटनाप्रति गम्भीर ध्यानाकर्षण भएको जनाउँदै सबैलाई संयमता अपनाउन र सामाजिक तथा धार्मिक सद्भाव कायम राख्न आग्रह गरेका छन् ।
सोमबार जारी गरेको वक्तव्यमा मन्त्री दासले वर्तमान परिस्थितिमा उत्तेजनाभन्दा शान्ति, संयमता र आपसी सद्भावको आवश्यकता बढी रहेको उल्लेख गरेका छन् ।
उनले कुनै पनि अफवाह वा उत्तेजनात्मक गतिविधिमा नलाग्न सबै पक्षसँग अपिल गरेका छन् । मन्त्री दासले घटनाको तत्काल निष्पक्ष, स्वतन्त्र र विश्वासयोग्य छानबिन गरी सत्यतथ्य सार्वजनिक गर्न सरकारसँग माग गरेका छन् ।
साथै, घटनामा घाइते भएकाहरूको प्रभावकारी उपचारको व्यवस्था गर्न तथा मृत्यु भएका व्यक्तिका परिवारलाई आवश्यक राहत र सहयोग उपलब्ध गराउन पनि सरकारको ध्यानाकर्षण गराएका छन् ।
उनले शान्ति, सहिष्णुता र सामाजिक एकता कायम राख्न सबै राजनीतिक दल, सामाजिक संघसंस्था, धार्मिक अगुवा तथा सर्वसाधारण नागरिकलाई जिम्मेवार भूमिका निर्वाह गर्न आग्रह गरेका छन् ।
मन्त्री दासले कानुनी प्रक्रियामार्फत दोषीलाई कारबाही गर्दै न्याय सुनिश्चित गर्नुपर्नेमा समेत जोड दिएका छन् ।
