काठमाडौं, असार २ । ललितपुरको जावलाखेलस्थित डीएभी कलेजमा कक्षा १२ मा अध्ययनरत १८ वर्षीय विद्यार्थी आर्यन सिंहको छतबाट हाम फालेर मृत्यु भएको छ।
जिल्ला प्रहरी परिसर ललितपुरका प्रवक्ता एसपी गौतम मिश्रका अनुसार सोमबार दिउँसो करिब साढे १२ बजे कलेजको छतबाट हामफालेका उनलाई तत्काल उपचारका लागि सुमेरू सिटी अस्पताल लगिएको थियो। उपचारकै क्रममा अस्पतालले उनलाई मृत घोषणा गरेको हो।
काठमाडौं महानगरपालिका–७, चावहिल निवासी सिंहले घटनाअघि एउटा कपीमा केही कुरा लेखेर छाडेको प्रहरीले जनाएको छ। हिन्दी भाषाको रोमन लिपिमा लेखिएको उक्त सामग्री प्रहरीले अध्ययन गरिरहेको छ।
प्रहरीका अनुसार प्रारम्भिक अनुसन्धानमा उनको लेखाइबाट मानसिक तनाव वा समस्या झल्किने देखिएको छ। घटनाबारे थप अनुसन्धान जारी रहेको प्रहरीले जनाएको छ।
यदि तपाईं वा तपाईंले चिन्ने कोही व्यक्ति मानसिक तनावमा हुनुहुन्छ वा आत्महत्यासम्बन्धी सोच आइरहेको छ भने, नजिकका परिवार, साथीभाइ वा मानसिक स्वास्थ्य विशेषज्ञसँग तत्काल सहयोग लिनुहोस्।
