काठमाडौं, २६ जेष्ठ । गृह मन्त्रालयले कर्णाली प्रदेश प्रहरी अस्पताल, सुर्खेतमा कार्यरत प्रहरी निरीक्षक -इन्सपेक्टर- डा. विवेक पन्थीलाई गैरहाजिरीबारे स्पष्टीकरण दिन निर्देशन दिएको छ ।
दुई दिनको भइपरी बिदा सकेपछि चैत ३० गतेदेखि कार्यालयमा हाजिर नभएको र सम्पर्कविहीन रहेकाले मन्त्रालयले प्रक्रिया अघि बढाएको जनाएको छ ।
गोरखापत्रमार्फत सूचना जारी गर्दै मन्त्रालयले बाटोको म्यादबाहेक ७ दिनभित्र सन्तोषजनक स्पष्टीकरणसहित कार्यालयमा उपस्थित हुन भनेको छ ।
तोकिएको अवधिमा उपस्थित नभए प्रहरी नियमावलीअनुसार भविष्यमा सरकारी सेवाका लागि अयोग्य नठहरिने गरी सेवाबाट हटाइने चेतावनी दिइएको छ ।
