सिरहा, २५ जेष्ठ । सिरहामा एसईई र कक्षा–१२ परीक्षाका क्रममा जफत गरिएका करिब ५०० मोबाइल फोन तथा स्मार्ट घडी पानीमा डुबाएर नष्ट गरिएको घटनाविरुद्ध संयुक्त विद्यार्थी संगठनहरूले प्रदर्शन गरेका छन् ।
विद्यार्थीहरूले सिरहा क्याम्पसदेखि जिल्ला प्रशासन कार्यालयसम्म ¥याली निकाल्दै पीडितलाई उचित क्षतिपूर्ति, निष्पक्ष छानबिन र दोषीमाथि कानुनी कारबाहीको माग गरेका छन् ।
प्रमुख जिल्ला अधिकारीमार्फत बुझाइएको ज्ञापनपत्रमा कानुनी प्रक्रिया पूरा नगरी निजी सम्पत्ति नष्ट गरिएको भन्दै आपत्ति जनाइएको छ । विद्यार्थी संगठनहरूले परीक्षा अनियमिततामा संलग्नलाई कानुनअनुसार कारबाही गर्न सकिने भए पनि निजी सम्पत्ति नष्ट गर्ने अधिकार कसैलाई नभएको बताएका छन् ।
जिल्ला प्रशासन कार्यालयले गत चैतमा परीक्षाका क्रममा जफत गरिएका सात आइफोन, ४८९ एन्ड्रोइड मोबाइल र पाँच स्मार्ट घडीसहित करिब एक करोड रुपैयाँभन्दा बढी मूल्यका उपकरण २४ घण्टा पानीमा डुबाएर नष्ट गरेको थियो ।
प्रशासनले परीक्षाको मर्यादा कायम राख्न उक्त कदम चालिएको जनाएको भए पनि अभिभावक, कानुन व्यवसायी र विद्यार्थी संगठनहरूले त्यसको विरोध गर्दै न्याय र क्षतिपूर्तिको माग गरेका छन् ।
