काठमाडौं, २३ जेठ । सिरहामा एसईई र कक्षा १२ को परीक्षाका क्रममा जफत गरिएका करिब ५०० थान मोबाइल नष्ट गरिएपछि अभिभावकहरूले जन्मदर्ता, फोटो तथा अन्य महत्वपूर्ण विवरण गुमाउनु परेको गुनासो गरेका छन् ।
अभिभावकहरूले मोबाइल नष्ट नगर्न पटक पटक अनुरोध गरे पनि जिल्ला प्रशासन कार्यालय र शिक्षा विकास तथा समन्वय इकाइले बेवास्ता गरेको आरोप लगाएका छन् ।
अभिभावक तारकेश्वर यादवले मोबाइलमा सुरक्षित राखिएको भान्जाको जन्मदर्ता र पारिवारिक तस्बिरहरू हराएको बताए । मोबाइल जफत भएका विद्यार्थीहरूले पनि आफन्तका सम्पर्क नम्बर, फोटो र अन्य सामग्री गुमाउँदा मानसिक तनाव भोग्नुपरेको बताएका छन् ।
केही अभिभावकले चिट नचोरी केवल मोबाइल बोकेको आधारमा मोबाइल खोसिएको गुनासो गरेका छन् । लहान नगरपालिकाका प्रमुख महेश प्रसाद चौधरी ले परीक्षा समितिको निर्णयअनुसार मोबाइल नष्ट गरिएको बताएका छन् ।
यता शिक्षक महासंघका पूर्वअध्यक्ष बाबुराम थापा ले परीक्षा हलमा मोबाइल निषेध हुनु स्वाभाविक भए पनि मोबाइल नै नष्ट गर्नु अनुचित र कठोर कदम भएको टिप्पणी गरेका छन् ।
