काठमाडौं, २३ जेठ । सीमा सम्बन्धी प्रधानमन्त्रीको अभिव्यक्तिप्रति असन्तुष्टि जनाउँदै श्रम संस्कृति पार्टीले शनिबार काठमाडौंको माइतीघर मण्डलामा विरोध प्रदर्शन गरेको छ ।
पार्टीले प्रधानमन्त्रीले संसदमा दिएको अभिव्यक्ति राष्ट्रिय हित र राष्ट्रिय स्वाभिमानविपरीत रहेको दाबी गर्दै खबरदारी सभासहित प्रदर्शन आयोजना गरेको हो ।
प्रदर्शनका क्रममा सहभागीहरूले प्रधानमन्त्रीले नेपालले भारतको भूमि मिचेको भन्ने आशय व्यक्त गरेको भन्दै उक्त अभिव्यक्ति तथ्यहीन र गैरजिम्मेवार रहेको आरोप लगाए । उनीहरूले प्रधानमन्त्रीलाई आफ्नो भनाइ फिर्ता लिन तथा सीमासम्बन्धी विषयमा स्पष्ट धारणा सार्वजनिक गर्न आग्रह गरेका थिए ।
माइतीघरमा आयोजित कार्यक्रममा सहभागीहरूले नेपाली माटोको रक्षा गरौँ, राष्ट्रको सम्मान जोगाऔँ, गैरजिम्मेवार अभिव्यक्तिको विरोध गरौँ, लगायतका नारासहितका प्लेकार्ड प्रदर्शन गरेका थिए ।
प्रदर्शनकारीहरूले सीमा र राष्ट्रिय सार्वभौमिकतासँग सम्बन्धित विषयमा राज्यका उच्च पदाधिकारीहरूले जिम्मेवार र तथ्यमा आधारित अभिव्यक्ति दिनुपर्नेमा जोड दिएका थिए ।
कार्यक्रमलाई सम्बोधन गर्दै श्रम संस्कृति पार्टीका सांसद आरेन राई ले सीमाका विषयमा प्रधानमन्त्रीले संसदमा दिएको अभिव्यक्ति उपयुक्त नभएको टिप्पणी गरे ।
उनले सरकारलाई तथ्य र प्रमाणका आधारमा आफ्नो धारणा स्पष्ट पार्न पनि आग्रह गरे।श्रम संस्कृति पार्टीले आगामी दिनमा पनि राष्ट्रिय हितसँग जोडिएका विषयमा खबरदारीमूलक कार्यक्रमलाई निरन्तरता दिने जनाएको छ ।
