काठमाडौं, १८ जेठ । दाङको तुलसीपुरमा टिपरले मोटरसाइकललाई ठक्कर दिँदा बाबु–छोराको मृत्यु भएको छ भने आमाको घाइते भएकी छन् ।
सोमबार बिहान तुलसीपुरस्थित गुल्म चोकमा भएको दुर्घटनामा लमही नगरपालिका–५ का ३५ वर्षीय मनोज नेपाली र उनका ५ वर्षीय छोरा मीनराज नेपाली गम्भीर घाइते भएका थिए ।
दुवैको उपचारका क्रममा कोहलपुरस्थित शिक्षण अस्पतालमा मृत्यु भएको प्रहरीले जनाए । दुर्घटनामा मनोजकी श्रीमती ३४ वर्षीया अमृता नेपाली घाइते भएकी छन् । उनको अस्पतालमा उपचार भइरहेको छ ।
प्रहरीका अनुसार रा१ख २१९२ नम्बरको टिपरले रा४प ३३९० नम्बरको मोटरसाइकललाई ठक्कर दिएको थियो । दुर्घटनामा संलग्न टिपर र चालकलाई नियन्त्रणमा लिएर थप अनुसन्धान भइरहेको प्रहरीले जनाए ।
